Facebook opnar fyrir færslur barna

Nú geta börn og unglingar undir 18 ára aldri, sett inn færslur og myndir á Facebook-síður sínar, þannig að þær séu opnar öllum. Til verndar börnum hefur slíkt verið bannað samkvæmt reglum Facebook, þar til nú. Þetta kemur fram á vefsíðunni Techrunch.

Rökin fyrir því að opna á þennan möguleika fyrir börn eru að börn og unglingar séu að verða klókari og betur meðvituð um internetið. Önnur rök eru að ungar stjörnur, vilja láta rödd sína heyrast í umræðum á netinu.

Þar sem þetta getur leitt til þess að börn, eins og aðrir, setji eitthvað inn sem þau sjái svo eftir, verða þau í hvert skipti sem þau opna færslur sínar fyrir öllum, að samþykkja sérstaka skilmála þar sem þau samþykkja að þau skilji áhættuna og afleiðingarnar.

Þetta er talsverð breyting frá því sem verið hefur. Hingað til hafa börn og unglingar á aldrinum 13 til 17 ára sjálfkrafa verið skráð þannig að færslurnar þeirra eru eingöngu opnar fyrir vini. Fyrir fullorðna fer stillingin á Facebook sjálfkrafa á opið fyrir vini vina.