Neyðarástand í New York: Hundruð þúsunda án rafmagns

Að minnsta kosti einn er látinn og sex hundruð þúsund manns eru án rafmagns á norðausturströnd Bandaríkjanna þar sem mikið hríðarveður hefur geysað undanfarnar klukkustundir.

Neyðarástandi hefur verið lýst yfir í fimm ríkjum þar á meðal Massachusetts og New York og hafa samgöngur víða farið úr skorðum, þannig er búið að aflýsa yfir fjögur þúsund og þrjú hundruð flugferðum, þar á meðal flugi Icelandair frá Boston og New York nú í morgunsárið en búist er við að samgöngur verði aftur komnar af stað síðdegis í dag samkvæmt tilkynningu frá félaginu, en farþegar eru beðnir um að fylgjast með brottfarartímum.

Allt að þrjátíu sentimetra jafnfallinn snjór liggur yfir stórum hluta svæðisins og hefur íbúum verið sagt að halda sig innandyra auk þess sem umferð er bönnuð í Massachusetts nema í neyðartilvikum en þetta er eitt versta veður sem gengið hefur yfir ríkið í marga áratugi.