Neyðarfundur vegna hrossakjötsins

Bresk heilbrigðisyfirvöld hafa boðað til neyðarfundar með matvælaframleiðendum og forsvarsmönnum stórmarkaða í dag vegna hrossakjötshneykslisins svokallaða sem hefur vakið sterk viðbrögð meðal almennings í Bretlandi.

Á fundinum verða fyrirhugaðar rannsóknir á matvælum sem gætu innihaldið hrossakjöt ræddar. Ákveðið hefur verið að kanna hvort að hrossakjöt leynist í mat sem grunnskólabörnum í Bretlandi og sjúklingum á breskum sjúkrahúsum er boðinn, en yfirvöld þar í landi óttast að svo sé. Þá verður einnig ráðist í innihaldsprófanir á vörum í smásölu.

Þetta var ákveðið í kjölfar þess að niðurstöður rannsókna á nautalasagne frá matvælaframleiðandanum Findus sýndu fram á að ellefu tegundir af átján innihéldu hrossakjöt. Fyrirtækið hafði vitneskju um innihaldið í rúma viku áður en niðurstöðurnar birtust almenningi en það aðhafðist ekkert í málinu. Þá fannst um miðjan síðasta mánuð hrossakjöt í hamborgurum sem seldir voru í nokkrum af stærstu verslunarkeðjum Bretlands, þar á meðal Tesco, Iceland og Aldi en forsvarsmenn þeirrar síðastnefndu höfðu vitneskju um innihaldið.

Umhverfisráðherra Bretlands, segir þetta vera algjörlega óásættanlegt og er hann harðákveðinn í að komast til botns í málinu, hvort að um algjöra vanhæfni framleiðenda sé að ræða eða alvarlegt og glæpsamlegt samsæri.

Svo virðist sem málið einskorðist ekki við Bretland því ákveðið hefur verið að ráðast í rannsóknir á vörum í smásölu víðar í Evrópu vegna gruns um að þær innihaldi hrossakjöt.