Kagawa átti erfitt með öndun

Sjúkrabíll var kallaður til heimilis Shinji Kagawa, leikmanns Manchester United, eftir leik liðsins gegn Everton á miðvikudagskvöldið.

Enskir fjölmiðlar greina frá þessu í dag og fullyrða að Kagawa hafi átt erfitt með andardrátt.

Hann var í byrjunarliði United í tapleiknum gegn Everton en tekinn af velli á 58. mínútu. Hann fann fyrir óþægindum eftir að heim var komið og er talið að nágranni hans hafi hringt á sjúkrabíl.

Heimildamaður breska blaðsins The Sun segir að líðan Kagawa í dag sé góð.