Obama fagnar samkomulagi um að Sýrlendingar láti efnavopn undir alþjóðlega stjórn

Umsókn Sýrlans um aðild að Efnavopnasamningi Sameinuðu þjóðanna hefur verið samþykkt. Samkvæmt sáttmálanum mega aðildarríki hvorki eiga né framleiða efnavopn en aðild Sýrlands að sáttmálanum kemur í kjölfar samkomulags stjórnvalda þar í landi um að efnavopn sem þar eru fari undir alþjóðlega stjórn.

Sýrlendingar hafa fallist á að gefa upp efnavopn þau sem til eru í landinu undir alþjóðlega stjórn innan viku en Barack Obama telur þó mikla vinnu framundan í landinu. Það voru Rússnensk stjórnvöld sem höfðu milligöngu um samninginn en nú liggur fyrir það mikla verkefni að eyða gríðarlegu magni efnavopna sem talið er að Sýrlensk stjórnvöld hafi undir höndum. 

Obama sagði í yfirlýsingu í dag að hann fagnaði því að samningur hefði náðst um að Sýrlendingar láti af hendi efnavopn. Hann sagði að Bandaríkjamenn myndu áfram vinna með öðrum löndum og Sameinuðu þjóðunum að því að ganga úr skugga um að samningnum yrði framfylgt. Einnig sagði Obama að ef ríkisstjórn Bashar Al-Assad myndi ekki standa við gefin loforð, þá væru stjórnvöld í Bandaríkjunum tilbúin að grípa til aðgerða.

Aðild Sýrlands var samþykkt í dag en ríkið gerist formlega aðili að sáttmálanum eftir mánuð en talið er þetta sé fyrsti prófsteinninn á það hvort Sýrlandsstjórn hafi í hyggju að láta af hendi efnavopn sem hún hefur til umráða.