Suarez farinn í sumarfrí

Það varð endanlega ljóst í gær að hinn úrúgvæski framherji Liverpool, Luis Suarez, er á leið í tíu leikja bann. Hann ákvað þá að sleppa því að áfrýja banninu sem hann hafði fengið fyrr í vikunni.

Suarez missir því af síðustu fjórum leikjum Liverpool í vetur sem og af fyrstu sex leikjum liðsins næsta vetur.

Bannið fékk Suarez fyrir að bíta Branislav Ivanovic, leikmann Chelsea, í leik liðanna um síðustu helgi.

„Ég er í alvörunni virkilega miður mín yfir þessu. Ég vona að allt fólkið sem ég brást á Anfield síðasta sunnudag finni það hjá sér að fyrirgefa mér þessa uppákomu,“ sagði Suarez á Twitter í gær og bætti við að hann myndi senda út röng skilaboð með því að áfrýja. Jafnvel þótt honum fyndist bannið vera of langt.

„Þetta mótlæti mun hjálpa mér við að haga mér betur í framtíðinni. Nú einbeiti ég mér að því að verða betri fótboltamaður, innan vallar sem utan,“ bætti Suarez við.

Fjölmargir á Englandi hafa keppst við að fordæma hegðun Suarez og nú síðast sjálfur forsætisráðherra Bretlands, David Cameron. Hann sagði að Suarez væri slæm fyrirmynd.

Suarez er fyrirmynd

Seinni partinn í gær sendi aganefnd enska knattspyrnusambandsins síðan frá sér skýrslu þar sem bannið er rökstutt.

Í þeirri löngu skýrslu kemur meðal annars fram að aganefndin líti svo á að Suarez sjái ekki hversu alvarlegt brot hans sé. Það sé nauðsynlegt að senda út sterk skilaboð svo öllum sé fullljóst að slík hegðun eigi ekki heima á knattspyrnuvellinum. Hundruð milljóna um allan heim hafi séð atvikið og þetta sé ekki sú mynd sem sambandið vilji að fólk hafi af enska boltanum.

„Allir leikmenn í úrvalsdeildinni eru fyrirmyndir og hafa þá skyldu að haga sér á ábyrgan hátt. Þeir eiga að vera öllum hinum fyrirmynd og þá sérstaklega ungum leikmönnum,“ segir meðal annars í skýrslunni.

Þetta er í annað sinn sem Suarez fer í langt bann fyrir að bíta andstæðing. Hann var dæmdur í sjö leikja bann í Hollandi árið 2010 er framherjinn, sem þá lék með Ajax, beit leikmann PSV Eindhoven.

Arsene Wenger, stjóri Arsenal, segir að sú staðreynd að Suarez sé síbrotamaður á vellinum sé ástæðan fyrir því að hann hafi fengið svona langt bann.

„Þetta er mjög alvarlegt brot og ekki í fyrsta skipti sem hann gerir sig sekan um alvarlegt brot. Þess vegna fær hann svona langt bann. Ég get ekki séð neina aðra ástæðu,“ sagði Wenger en í skýrslunni er sérstaklega tekið fram að fyrri dómar hafi ekki haft áhrif á þessa niðurstöðu.

Forráðamenn Liverpool eru verulega ósáttir við þetta langa bann og hafa meðal annars bent á að enska knattspyrnusambandið hafi ekki refsað Jermain Defoe árið 2006 er hann virtist bíta Javier Mascherano.

Ashley Barnes, leikmaður Brighton, fékk síðan sex leikja bann fyrir að fella dómara í leik í síðasta mánuði. Forráðamenn Liverpool segja að samræmið í þessum dómum sé ekkert.

Dómstóllinn sem tók málið fyrir segir að brot Suarez sé alvarlegra en brot Barnes og þar af leiðandi eigi Suarez að fá þyngri dóm en Barnes.