Kærði eiginkonuna fyrir að ala sér ófríð börn

Maður í Kína hafði betur fyrir dómstólum í máli gegn fyrrverandi eiginkonu sinni sem ól honum, að hans mati, ófríð börn. New York Post greinir frá þessu. Feng Jian sagði fyrir dómstólum að fyrrverandi eiginkona hans hefði leynt fyrir sér að hún hefði farið í umfangsmiklar lýtaaðgerðir til að líta betur út.

Maðurinn taldi ómögulegt að þau gætu eignast ófríð börn og fór fram á DNA próf eftir að dóttir þeirra fæddist. Hann grunaði eiginkonuna um framhjáhald en síðar tjáði konan manninum að hún hefði laggst undir hnífinn í þeim tilgangi að líta betur út.

Dómstóll í Kína dæmdi konuna til að borga sínum fyrrum eiginmanni um 15 milljónir íslenskra króna í skaðabætur fyrir að lokka manninn í hjónaband á fölskum forsendum.

Mikil umræða hefur verið um lýtaaðgerðir í Kína, Hong Kong, Suður-Kóreu og Japan að undanförnu. Umdeild auglýsing hefur að undanförnu verið í dreifingu en hún sýnir myndarleg hjón ásamt þremum börnum sínum sem eru ekki eins myndarleg. Undir myndinni stendur: „Einu áhyggjurnar við lýtaaðgerðir er að útskýra þær fyrir börnunum þínum.“

Uppfært 20.30



Eins og fram kemur í fréttinni hér að ofan var hún fengin af fréttasíðu New York Post. Fréttin reyndist hins vegar röng. Þetta kom í ljós eftir ábendingar frá lesendum Vísis. Fjölmargir miðlar víða um heim hafa dottið í sömu gryfju. Ritstjórn Vísis biðst afsökunar á þessum misskilningi og þakkar árvökulum lesendum fyrir gott aðhald.