Fjórir látnir í fárviðrinu

Einn öflugasti fellibylur sögunnar reið yfir Filippseyjar í nótt og varð að minnsta kosti fjórum að bana. Meira en 700 þúsund manns þurftu að yfirgefa heimili sín.

Fellibylurinn, sem fékk nafnið Haiyan, skall fyrst á suðurenda eyjunnar Samar og hélt síðan yfir á eyjuna Leyte, um 650 kílómetra suðaustur af höfuðborginni Manilla.

Einn þeirra sem létust varð fyrir eldingu, annar varð undir tré sem rifnaði upp en tveir létust af völdum rafmagnslosts.

Óttast er að fleira fólk hafi látið lífið í hamförunum. Eignatjón varð mikið og frá sumum svæðum hafa engar fréttir borist.

Meðal þeirra sem þurftu að yfirgefa heimili sín voru íbúar í Bohol, en margir þeirra bjuggu í bráðabirgðaskýlum og tjöldum eftir jarðskjálftann, sem reið þar yfir í síðasta mánuði og mældist 7,2 stig.

Algengt er að fellibyljir skelli á Filippseyjum, en þetta er sá 24. af stærri gerðinni sem íbúar eyjanna hafa kynnst á þessu ári.