Elding hlóð farsíma

Vísindamönnum hefur nú tekist að hlaða farsímarafhlöðu með eldingu. Frá þessu greinir á Huffington post.

Það voru vísindamenn frá Háskóla í Southampton sem tóku höndum saman við símafyrirtækið Nokia í því skyni að rannsaka möguleikann á því að nýta þessa, eina þýðingarmestu, uppsprettu orku úr náttúrunni.

„Við vorum furðulostin þegar við sáum að rafrásarbúnaður Nokia stillti á einhvern hátt rafmerkið sem gerði rafhlöðunni kleift að hlaða sig,“ sagði Neil Palmer, vísindamaður, þegar hann lýsti ferlinu. Tvö hundruð volta straumur var sendur í gegnum 300 mm bil og „gaf hita og ljós sambærilegt eldingu.“

Hann segir uppgötvunina sanna það að raftæki geti verið hlaðin í gegnum straum sem fer í gegnum loft og að þetta sé stórt skref í áttina að því að skilja náttúrulegan raforkugjafa eins og eldingu. Ein elding gæti séð heilu heimili fyrir orku í einn mánuð.  

„Vð mælum að sjálfsögðu ekki með því að fólk reyni þetta heima hjá sér,“ sagði Chris Weber, en hann er yfir sölu- og markaðsdeild Nokia. „En við erum alltaf að reyna að rjúfa og ýta á takmörk tækninnar og finna nýjar leiðir til þess að bæta afköst framleiðsluvöru okkar.“