Þrátefli í borgarastríðinu

Aðstoðarforsætisráðherra Sýrlands segir að þrátefli sé nú komið upp í borgarastríðinu í landinu.

Hvorug fylkingin sé nægilega öflug til þess að bera sigur úr býtum. Ráðherrann, Qadri Jamil segir í viðtlai við dagblaðið Guardian í dag að ef halda eigi friðarviðræður í Genf eins og lagt hafi verið til, verði fyrst að semja um vopnahlé við uppreisnarmenn.

Jamil segir stríðið hafa haft hörmulegar afleiðingar fyrir landið. Hundrað þúsund manns liggja í valnum og tekjutap ríkisins nemur þúsundum milljarða.

Bandaríkjamenn leggja nú hart að öryggisráði Sameinuðu þjóðanna að álykta um að Sýrlendingar eyði efnavopnabúri sínu en ráðið kemur saman í næstu viku.

John Kerry utanríkisráðherra segir mikilvægt að Öryggisráðið nái nú að samþykkja bindandi ályktun í málinu.