Rukkaði syrgjandi föður um nýjan flugmiða

Skurðlækninum Muhammad Taufiq Sattar var gert að greiða um 30 þúsund krónur (160 pund) fyrir að breyta flugi sem hann átti pantað með flugfélaginu Ryanair.

Muhammad hafði átt pantað kvöldflug frá Dublin í Írlandi til Leicester í Englandi. Eftir að hann fékk þær hörmulegu fréttir að fjölskylda hans hefði látist í bruna vildi hann breyta fluginu og fara með morgunflugi til að komast sem fyrst heim.

Þegar hann mætti á flugvöllinn í Dublin var hann hágrátandi og sagði starfsmönnum flugfélagsins hvað gerst hefði.

Hann bað um að fá að breyta miðanum sínum þannig að hann kæmist með næsta flugi til Birmingham á Englandi. Þá var honum sagt að hann yrði að kaupa nýjan miða. Yfir sig hissa á framkomunni keypti Muhammad nýjan miða.

Hann veitti fréttablaðinu Irish Daily viðtal þegar hann snéri aftur til Dublin. Hann sagði í viðtalinu að hann hefði búist við því í ljósi aðstæðna að það yrði ekki mikið mál að breyta miðanum, þar sem hann hafði þegar keypt miða hjá flugfélaginu.

Muhammad sagðist ekki vilja gera mikið mál úr þessu en hann hefði ekki búist við þessari framkomu.

Í yfirlýsingu frá flugfélaginu kom fram að þeir hygðust borga Muhammad flugfarið til baka og vottaði honum samúð.