Ráðist á kennara með kústi

Myndband sem sýnir suðurafrískan skólapilt ráðast á kennara sinn með kústi og stól hefur vakið athygli og óhug en árásin átti sér stað í Glenvista-skólanum í Jóhannesarborg á miðvikudag.

Í myndbandinu má heyra bekkjarfélaga drengsins fagna, hlæja og hvetja hann áfram. Kennarinn flýr kennslustofuna en drengurinn eltir og reynir að kasta kústinum í hann.

Angie Motshekga, menntamálaráðherra Suður-Afríku, segir myndbandið ógnvekjandi. Hún telur að refsa eigi drengnum og þeim sem hvöttu hann áfram.

„Þetta atvik ber að fordæma,“ hefur fréttastofa Sky eftir henni og hefur Motshekga mælst til þess að öllum sem urðu vitni að árásinni verði veitt áfallahjálp. Þá segir hún að ofbeldi líkt og myndbandið sýnir verði ekki liðið, hvorki af kennurum né nemendum í landinu.