Þúsundir vilja stjórnina burt

Þúsundir manna héldu út á götur í smáríkinu Barein í gær til að krefjast lýðræðisumbóta og heimta að stjórnin segi af sér.

Meðal mótmælendanna var Kalíl al-Marsúk, einn helstu leiðtoga stjórnarandstöðunnar í Barein, en hann var nýsloppinn úr fangelsi.

Hann á yfir höfði sér ákærur fyrir að hvetja til ofbeldis, en neitar allri aðild að sprengjuárásum og öðru ofbeldi.

Sjía-múslimar eru í meirihluta í Barein og hafa allt frá byrjun ársins 2011 efnt reglulega til mótmæla gegn minnihlutastjórn súnní-múslima, sem nýtur stuðnings Sádi-Arabíu.