ESB beitir refsiaðgerðum gegn Færeyjum vegna síldveiðideilu

Aðildarríki ESB samþykktu í dag að beita refsiaðgerðum gegn Færeyjum vegna deilu um veiðar úr norsk-íslenska sídarstofninum. Aðgerðirnar munu fela í sér bann á löndun og sölu síldar- og makrílafurða í löndum ESB, en bannið mun ekki taka gildi fyrr en framkvæmd þess hefur verið útfærð.

Framkvæmdastjórn ESB var ósátt við að færeyingar skyldu úthluta sér kvóta einhliða úr síldarstofninum og lögðu til refsiaðgerðir í vor. Nú hefur verið samþykkt að grípa til aðgerða sem munu taka til allra aðildarríkja, þar með talið Danmerkur.

Mette Gjerskov, matvælaráðherra Danmerkur, segir í yfirlýsingu að þessi ákvörðun sé henni vonbrigði þar sem hún hafi barist fyrir því að reynt yrði til þrautar að ná samkomulagi.

"Við höfum, allt frá því að tilkynnt var um aðgerðirnar, unnið innan sambandsins, með færeyjum að því að viðræður um aflaheimildir yrðu teknar upp á ný til að ekki þurfi að grípa til refsiaðgerða. Það er vegna þess að við metum ríkjasambandið við Færeyjar mikils á meðan við lítum einnig að sjálfsögðu til þess að veiðarnar séu sjálfbærar," segir Gerskov.

"Ég skynja vilja til að ná samkomulagi og þess vegna finnst mér ESB hafa gripið of fljótt til refiaðgerða. Þess utan ætti að reyna að leysa deiluna á grundvelli hafréttarsáttmála SÞ í stað þess að grípa til refsiaðgerða."