Fleiri óbreyttir falla í Afganistan

Alls létu 1.319 óbreyttir borgarar lífið í átökunum í Afganistan á fyrri helmingi þessa árs. Það er 161 fleiri en var á sama tíma í fyrra, sem nemur um fjórtán prósenta fjölgun. Þá fjölgaði særðum um rúman fjórðung, úr tæplega 2.000 upp í rúmlega 2.500.

Þetta kemur fram í nýrri skýrslu Sameinuðu þjóðanna, en alda ofbeldis sem hefur gegnið yfir landið að undanförnu eykur á efasemdir um að afganskar öryggissveitir muni koma til með að ráða við ástandið eftir að erlent herlið yfirgefur landið fyrir lok næsta árs. Vopnaðir hópar stjórnarandstæðinga hafa stóraukið umsvif sín í landinu það sem af er ári.

Langstærstur hluti fallinna og særðra, eða um tveir þriðju, er rakinn til aðgerða uppreisnarhópa sem hafa notað sprengjuárásir í enn frekara mæli en áður.

146 létust í aðgerðum stjórnarliða og bandamanna þeirra. Flestir vegna bardaga á jörðu niðri eða loftárása.

Skýrsluhöfundar vekja einnig athygli á þeim fjölda kvenna og barna sem hafa orðið fyrir barðinu á óöldinni sem ríkir víða í landinu. 106 konur og 231 barn féllu frá ársbyrjun til júníloka, en á sama tíma í fyrra létust 76 konur og 232 börn.

Talið er að yfir 20.000 óbreyttir afganskir borgarar hafi látið lífið í stríðsátökum og skærum í landinu frá innrás fjölþjóðaliðs undir forystu Bandaríkjanna haustið 2001.

Þá eru 574.000 Afganar eru á vergangi innanlands eftir að hafa hrakist frá heimilum sínum og enn fleiri hafa flúið land.