Óhugnalegar myndir frá Sýrlandi

Skelfilegar myndir frá borgarastyrjöldinni í Sýrlandi hafa vakið óhug en þar má meðal annars sjá fjölda barna sem létust í eiturvopnaárásinni á miðvikudaginn.

Talið er að minnsta kosti 355 hafi látist vegna taugagaseitrunar, þar af 54 börn. Tala látinna er þó á reiki. Um 3.600 manns hafa sýnt einkenni eitrunar, að því er segir í tilkynningu frá samtökunum Læknar án landamæra.

Bandaríska blaðið Boston Globe hefur tekið saman nokkrar myndir og birtir á heimasíðu sinni. Myndirnar eru sem fyrr segir skelfilegar og eru viðkvæmir varaðir við. 

Frá árinu 2012 hafa Læknar án landamæra unnið að því að koma á samstarfi milli sjúkrahúsa og sjúkrastöðva í Damaskus, höfuðborg Sýrlands, og meðal annars séð þeim fyrir lyfjabirgðum. Vegna ástandsins í borginni hefur þó reynst erfitt að nálgast lyfin.

Sjúklingarnir hafa aðallega leitað á þrjú sjúkrahús í Damaskus og segir starfsfólk sjúklinga sýna ýmis einkenni taugagaseitrunar.

„Læknar án landamæra geta ekki með vísindalegum hætti staðfest hver ástæða einkennana eru né hver er ábyrgur fyrir árásunum,“ er haft eftir Dr. Bart Janssens, yfirmanni Lækna án landamæra á svæðinu. Hann segir þó allt benda til þess að um einhverskonar efnavopn hafi verið notuð. „Það stangast algjörlega á við öll alþjóðlög sem banna alla notkun á efnavopnum.“

 

Andstæðingar Bashar al-Assad forseta segja að stjórnarherinn standi að baki árásunum sem áttu sér stað í úthverfum Damaskus á miðvikudaginn var. Þeir vilja að eftirlitsmenn Sameinuðu þjóðanna rannsaki málið.

Francois Hollande, forseti Frakklands, hefur tekið undir með andstæðingum al-Assad og segir stjórnarherinn ábyrgan fyrir efnavopnaárásunum.

Hollande fór fram á það að vopnaeftirlitsmönnum Sameinuðu þjóðanna yrði veittur aðgangur að vettvangi árásanna.

Barack Obama, forseti Bandaríkjanna, og David Cameron, forsætisráðherra Bretlands, ræddust við í gær og segjast halda öllum möguleikum opnum varðandi það hvort ákveðið verði að ráðast inn í Sýrland. 

Þeir eru sammála um það að komi í ljós að meint notkun efnavopna reynist á rökum reist megi búast við „alvarlegum“ aðgerðum af þeirra hálfu.