Danskir íhaldsmenn vilja lækka skatta um 860 milljarða

Danskir íhaldsmenn vilja lækka skatta um 40 milljarða danskra króna eða um 860 milljarða íslenskra króna í áætlunum til ársins 2020.

Formaður Íhaldsflokksins í Danmörku, Lars Barfoed, segir að peningana eigi að taka úr ríkiskassanum og færa yfir í vasann hjá fólkinu.

„Ef við viljum meiri frítíma með fjölskyldunni og skapa vöxt hjá fyrirtækjum landsins, þá þarf líka að forgangsraða fjármunum öðruvísi,“ segir Lars í viðtali við TV2.

Íhaldsmenn vilja stöðva vöxt hins opinbera, mæla með 33.000 færri ríkisstarfsmönnum en gert er ráð fyrir í áætlunum ríkisstjórnarinnar og vilja lækka eftirlaun.

Upplýsingafulltrúi sósíaldemókrata, Magnus Heunicke, segir áætlun Íhaldsflokksins undarlega og skilur ekki hvers vegna venjulegar danskar fjölskyldur eigi að borga fyrir skattalækkanir hinna ríku.