107 ára maður lést í skotbardaga við lögreglu

Hundrað og sjö ára karlmaður lést í skotbardaga við sérsveit lögreglunnar í Arkansas í Bandaríkjunum í gærkvöld.

Lögreglan var kölluð til heimilis í bænum Pine Bluff þar sem maðurinn mun hafa ógnað tveimur manneskjum. Þegar lögregluþjónarnir nálguðust dyrnar á herberginu þar sem maðurinn var, skaut hann á þá en hitti ekki.

Sérsveitin var kölluð til og kom hún skömmu síðar á vettvang. Ekki gekk að tala manninn til og fá hann til að gefast upp friðsamlega.

Lögreglan ruddist þá inn í herbergið með það að markmiði að afvopna manninn. Hann skaut hinsvegar á lögreglumennina sem skutu hann til bana.