Sprelllifandi maður fær úrskurði um andlát sitt ekki hnekkt

61 árs gamall bandarískur karlmaður er í þeirri undarlegu aðstöðu að fá úrskurði um andlát sitt ekki hnekkt, þrátt fyrir að vera sprelllifandi.

Donald Miller frá Ohio lét sig hverfa frá eiginkonu sinni, börnum og skuldum árið 1986 þegar hann var orðinn illa haldinn af alkóhólisma. Átta árum síðar hafði ekkert til hans spurst og var hann því úrskurðaður látinn.

Árið 2005 birtist hann síðan óvænt og við nokkuð góða heilsu. En það var ekki fyrr en núna sem hann reyndi að fá „endurlífgun“ fyrir dómstólum. Synjunina fékk hann vegna þess að samkvæmt lögum fylkisins er ekki hægt að breyta andlátsúrskurði, hafi meira en þrjú ár liðið frá honum.

„Þetta er furðulegt mál,“ segir dómarinn Allan Davis en bætir því við að ekki sé hægt að hrófla við úrskurðinum.