Hátt í 200 drepnir af uppreisnarmönnum

Uppreisnarmenn í Sýrlandi drápu allt að 190 óbreytta borgara og tóku um tvöhundruð í gíslingu í sókn sinni gegn stjórnarher Assads forseta í ágúst síðastliðnum.

Þetta kemur fram í nýrri skýrslu frá mannréttindasamtökunum Human Rights Watch. Fólkið sem var drepið var flest allt Alavítar, líkt og Bashar al-Assad forseti. Í skýrslunni segir að sterkar vísbendingar séu um að glæpir gegn mannkyni hafi verið framdir í tangarsókninni. Sóknin gegn stjórnarhernum hófst þann fjórða ágúst  í Latakía héraði og svo virðist sem flestir hinna almennu borgara hafi verið myrtir þann daginn og að flestir hafi þeir verið óvopnaðir.