Ein milljón barna aftur í skóla

Liður í umfangsmiklu starfi UNICEF, Barnahjálpar Sameinuðu þjóðanna, í Sýrlandi er verkefni sem miðar að því að koma 1 milljón barna aftur í skóla, að sögn Sigríðar Víðis Jónsdóttur, upplýsingafulltrúa UNICEF á Íslandi.

„Þetta er risavaxið verkefni en frá því á síðasta skólaári hafa nær tvær milljónir barna í Sýrlandi á aldrinum 6 til 15 ára orðið að hætta skólagöngu vegna átakanna í landinu. Mörg hafa ekki verið í skóla í tvö ár.“

Tæplega fjögur þúsund skólar, eða einn af hverjum fimm, hafa orðið fyrir skemmdum eða eyðilagst. Sumir eru bráðabirgðahúsnæði fyrir fjölskyldur á flótta.

Sigríður leggur áherslu á að það skipti ekki bara máli að sitja inni í skólastofu og læra.

„Þetta snýst líka um að hitta aðra krakka og leika, hafa rútínu og einhvern ramma utan um lífið. Það er mikilvægt að halda sér virkum, fara heim með verkefni og hafa eitthvað að snúa til daginn eftir. Þar sem neyðarástand ríkir veitir það börnum öryggi að halda menntun sinni áfram. Fyrir utan að vera lykillinn að framtíð þessara barna er menntunin þannig sálrænt mikilvæg. Þetta eru því afar gleðilegar fréttir.“