Fullyrt að ekki standi til að smíða kjarnorkusprengju

Barack Obama, forseti Bandaríkjanna, og Hassan Rouhani, forseti Írans, töluðu saman í síma í dag um mögulegar samningaumleitanir í kjarnorkudeilu þjóðanna. Þetta þykir merkilegt í ljósi þess að forsetar þjóðanna hafa ekki talast við símleiðis í meira en 30 ár, eða síðan 1979, og bendir til þess að raunverulegur vilji sé til þess að leysa deiluna.

Obama sagði samtalið hafa verið uppbyggilegt en bætti því við að enn eigi eftir að yfirstíga ýmsar hindranir til að lausn finnist á deilunni. „Ég tel að það sé grundvöllur fyrir lausn,“ sagði Obama bjartsýnn.

Fyrr í dag sagðist Rouhani vonast til þess að viðræður við bandarísk yfirvöld og aðrar þjóðir verði til þess að lausn finnist fljótlega, og fullyrti að að ekki stæði til að smíða kjarnorkusprengju, en það hafa Bandaríkjamenn og bandamenn þeirra lengi óttast.