Hálfkæringur Kerrys möguleg lausn á Sýrlandsdeilunni

Obama Bandaríkjaforseti segir að ef Sýrlendingar afhendi öll efnavopn sín til alþjóðlegra eftirlitsaðila gæti það orðið til þess að Bandaríkjamenn hætti við fyrirhugaðar árásir á landið.

Þetta kom fram í viðtali við forsetann á CNN sjónvarpsstöðinni í gærkvöldi. Málið er hið undarlegasta en hugmyndin virðist hafa kviknað þegar John Kerry utanríkisráðherra nefndi hana, að því er virðist í hálfkæringi í gær. Hann bætti reyndar við að þetta myndu Sýrlendingar aldrei gera. Sergei Lavrov utanríkisráðherra Rússa var snöggur til og hvatti Sýrlendinga til þess að fallast á tillöguna.

Nú berast þær fregnir frá Sýrlandi að menn þar á bæ taki vel í hugmyndina. Þetta myndi leysa vanda sem Obama er kominn í því nú virðist sem hann hafi ekki meirihluta þingmanna á bakvið sig en þeir ræða nú hvort lýsa eigi yfir stuðningi við hernað gegn Sýrlandi. Þá sýnir könnun CNN að sex af hverjum tíu Bandaríkjamönnum eru andvígir því að þingið veiti forsetanum grænt ljós á hernaðaraðgerðir.