Dónaskilaboð komu áströlskum þingmanni í koll

Nútímatækni býður upp á ótal tækifæri til samskipta, en það eru ekki allir jafn glúrnir í að færa sér hana í nyt og margir fara flatt á því þegar samskiptin komast upp á yfirborðið. Skemmst er að minnast borgarstjóraframbjóðandans Anthony Weiner í New York, en nú berast fréttir af Peter nokkrum Dowling, sem er þingmaður á ríkisþingi Queensland í Ástralíu.

Dowling, sem er fjölskyldufaðir og giftur til 27 ára, var formaður siðanefndar þingsins, var staðinn að því að halda við konu eina og senda henni skilaboð sem þykja ekki beint hæfa manni í hans stöðu, meðal annars myndir af kynfærum sínum.

Dowling hefur beðist afsökunar á framferði sínu sem hann segir óverjandi, og hefur sagt af sér nefndarformennsku.

Hann er einnig sakaður um að hafa notað stöðu sína sem þingmaður til þess að fá afslátt á flugferðum til að hitta hjákonuna, en neitar staðfastlega að hafa brotið nokkur lög í þeim málum.