Drap eiginkonu sína og setti mynd af líkinu á Facebook

„Núna bíður mín fangelsisvist eða dauðarefsing eftir að ég drap eiginkonu mína. Elska ykkur og sakna ykkar. Farið vel með ykkur Facebook-vinir. Þið munuð sjá mig í fréttunum,“ sagði Derek Medina, þrjátíu og eins árs maður frá Flórída, á Facebook-síðu sinni á dögunum.

Með stöðuuppfærslunni birti hann mynd af eiginkonu sinni sem lá í blóði sínu í eldhúsinu. Eftir að hafa skrifað skilaboðin á samskiptasíðuna sína ók hann til fjölskyldu sinnar og sagði þeim frá því sem hann gerði. Í kjölfarið fór hann á lögreglustöð og gaf sig fram.

Myndin af látnu eiginkonunni var inni á Facebook-síðu hans í fimm klukkutíma áður en starfsmenn samskiptasíðunnar fjarlægðu hana. Medina sagði að eiginkonan hafi beitt sig ofbeldi og því hann drepið hana.

Samkvæmt lögreglunni í Miami höfðu hjónin rifist heiftarlega sem endaði með því að hann skaut hana margsinnis.

Medina hefur verið ákærður fyrir morð af yfirlögðu ráði.