Marglyttur lokuðu einum stærsta kjarnakljúf í heimi

Loka varð þriðja kjarnakljúlf kjarnorkuversins í Oskarshamn í Svíþjóð á sunnudag eftir að vatnsinntak, sem kælir túrbínu kjarnakljúfsins, stíflaðist. Stór og mikil torfa af marglyttu kom upp að strönd Oskarshamn og athafnaði sig inn í vatnsinntaki kjarnorkuversins. Ekki fór betur en svo að vatnsinntakið stíflaðist og varð að losa um stífluna svo að kalt vatn bærist inn í kjarnorkuverið.

Kjarnakljúfurinn framleiðir 1.400 megavött af rafmagni og er einn stærsti kjarnakljúfur í heimi. Kjarnorkuverið í Oskarshamn þarf á stöðugu flæði vatns að halda til að kæla kjarnakljúfa og túrbínur versins.

Þetta er ekki í fyrsta sinn sem marglyttur valda vandræðum hjá kjarnorkuverum. Á síðasta ári varð kjarnorkuver á vesturströnd Bandaríkjanna að loka öðrum kjarnakljúf sínum eftir að marglyttur höfðu stíflað vatnsinntak.

Alls eru þrjú starfandi kjarnorkuver í Svíþjóð og framleiða þau tæp 40% af raforku landsins. 10 kjarnakjúfar eru í notkun í landinu.