Segja stríðið gegn ólöglegum vímuefnum hafa mistekist

Löggæsluyfirvöldum um allan heim hefur mistekist að draga úr framboði og aðgengi að ólöglegum vímuefnum. Þetta kemur fram í nýrri rannsókn sem birt er í British Medical Journal Open.

Þar segir meðal annars að verð á vímuefnum hafi almennt lækkað síðustu tuttugu ár samfara því að efnin eru orðin hreinni.

„Þessar niðurstöður styðja við sívaxandi sannanir um að stríðið gegn eiturlyfjum hafi misheppnast,“ segir Dr. Evan Wood, annar höfunda rannsóknarinnar.

„Við ættum frekar að einbeita okkur að því að  innleiða stefnu sem miðar að því að standa vörð um heilsu og öryggi og líta á vímuefnanotkun sem heilbrigðismál en ekki lögreglumál. Þar sem við sjáum nú að tilraunir til að draga úr framboði á vímuefnum eru ekki líklegar til að bera árangur, er mikil þörf á að efla meðferðir gegn fíkn og önnur úrræði til að draga í raun úr skaða sem hlýst af vímuefnaneyslu.“