Draga grænmetisát Neanderdalsmanna í efa

Ekki er víst að Neanderdalsmenn hafi lifað jafn heilsusamlegu lífi og vísindamenn hafa gert skóna, og ástæða til að efast um að þeir hafi borðað grænmeti að nokkru ráði segja vísindamenn við breska náttúruvísindasafnið í London.

Vísindamenn hafa hingað til gengið út frá því að grænmetisagnir sem fundist hafa á tönnum þessara fornmanna sýni fram á að þeir hafi borðað grænmeti. Neanderdalsmenn komu fram fyrir 200 þúsund árum og dóu út fyrir um 28 þúsund árum.

Ný rannsókn, sem vitnað er til í breska blaðinu Guardian, sýnir að Neanderdalsmenn gætu allt eins hafa borðað innihald maga dýranna sem þeir veiddu sér til matar.

Þekkt er að innihald maga grasbíta þótti sérstakt góðgæti meðal inúíta og annarra frumbyggjar Ameríku. Innihald magans er góð uppspretta C-vítamíns og ýmissa snefilefna. Bragðið og áferðin eru sögð minna á rjómaost, þó vísindamennirnir sem unnu rannsóknina hafi ekki smakkað til að sannreyna þá staðreynd.

„Mistökin sem vísindamenn virðast hafa gert er að gefa sér að það að plöntuleifar hafi fundist á tönnum þýði það að þær hafi komist þangað þegar kjötætur - í þessu tilviki Neanderdalsmenn - hafi borðað plönturnar af ásettu ráði til að bæta heilsu sína,“ segir Laura Buck, einn vísindamannanna, við Guardian.

„Staðreyndin er sú að þessar agnir gætu hafa komist á tennurnar eingöngu vegna þess að Neanderdalsmönnum hafi þótt innihald maga sumra þeirra dýra sem þeir veiddu lostæti,“ segir Buck.