105 börnum bjargað úr kynlífsþrælkun

Bandaríska alríkislögreglan (FBI) bjargaði 105 börnum úr kynlífsþrælkun í 76 borgum um helgina. Um 150 voru handteknir vegna málsins, grunaðir um að hafa selt níðingum aðgang að börnunum.

„Þessi aðgerð sýnir okkur hve mörg börn í Bandaríkjunum eru seld til kynferðislegra nota á hverjum degi, í mörgum tilfellum á netinu,“ er haft eftir John Ryan, framkvæmdastjóra bandarískrar miðstöðvar týndra og misnotaðra barna, NCMEC, í tilkynningu frá FBI.

Bandaríska fréttastöðin Fox fullyrðir að flest barnanna séu á aldrinum 13 til 17 ára, en þau yngstu eru níu ára.

Þetta er í sjöunda sinn sem FBI efnir til aðgerða af þessu tagi síðan 2003. Alls hefur 2.700 börnum verið bjargað á þessum tíu árum og 1.350 menn verið sakfelldir. Tíu þeirra hafa fengið ævilangt fangelsi fyrir brot sín gegn börnum.

Hér að neðan má sjá myndband sem FBI setti á Youtube með myndefni frá aðgerðunum um helgina.