Neyðarástand vegna kjarrelda í Ástralíu

Óttast er að kjarreldrar í Nýja Suður-Wales í Ástralíu færist í aukana á næstu dögum.

Miklum vindi er spá með háu hitastigi og þurrki. Yfirvöld á svæðinu hafa lýst yfir neyðarástandi. Þegar hafa um fjörutíu þúsund hektarar af skó vöxnu svæði orðið eldi að bráð en eldarnir komu upp fyrr í þessari viku.

Að minnsta kosti einn hefur látist en hundruðir heimila hafa brunnið til grunna. Það svæði sem hefur orðið hvað verst úti er Bláfjöll, vestan við Sydney. Þykkur reykjarmökkur hefur gert íbúum þar lífið leitt en hann hefur legið yfir borginni undanfarna daga.

Slökkviliðsmenn berjast nú við eldana en slökkvistarf hefur gengið illa enda er rok mikið á svæðinu. Íbúar í Nýja Suður-Wales hafa verið hvattir til að yfirgefa heimili sín eða leita skjóls. Líklegt þykir að kjarreldarnir nái hámarki sínu á miðvikudaginn næstkomandi.