Merkel malar kosningarnar

Angela Merkel Þýskalandskanslari vann stórsigur í þingkosningunum þar í landi en lokatölur urðu ljósar um miðnætti. Flokkur hennar, Kristilegir demókratar og bæverski systurflokkurinn CSU fengu 41,5 prósent atkvæða og um tíma var talið líklegt að Merkel næði hreinum meirihluta á þinginu, en slíkt hefur ekki gerst í Þýskalandi í hálfa öld.

Slæmu fréttirnar fyrir Merkel eru þær að samstarfsflokkurinn Frjálsir demókratar, sem myndaði síðustu ríkisstjórn með flokki Merkel, náði ekki inn á þing. Þýski Jafnaðarmannaflokkurinn náði tæpum 26 prósentum í kosningunum og talið er líklegast að Merkel reyni fyrst að fara í samstarf með þeim en slík stjórn myndi hafa tæplega 68 prósent atkvæða á bakvið sig.