Pútín hvetur Obama til að fara sér hægt

Vladimír Pútín Rússlandsforseti segir það vekja ugg hve algengt það sé orðið að Bandaríkin beiti hernaði til að grípa inn í átök í öðrum ríkjum.

„Milljónir manna víða um heim eru í auknum mæli hætt að líta Bandaríkin sem fyrirmynd lýðræðis heldur reiði þau sig einungis á hráa valdbeitingu, og hrófla saman bandalögum undir slagorðinu: Annað hvort ertu með okkur eða þú ert á móti okkur,” skrifar Pútín í grein, sem birtist í bandaríska dagblaðinu New York Times í morgun.

Hann segir valdbeitinguna hins vegar hafa reynst áhrifalitla og marklausa, hvort sem litið er til Afganistans, Líbíu eða Íraks, og varar Bandaríkin við að endurtaka mistökin í Sýrlandi.

„Engu skiptir hve hnitmiðaðar árásirnar eru eða hve fullkomin vopnin eru, óhjákvæmlegt er að almennir borgarar láti lífið, þar á meðal aldrað fólk og börnin, sem árásirnar eiga að verja,” skrifar Pútín.

Hann hvetur Barack Obama til að fara að alþjóðalögum og reyna að leysa málin með friðsamlegum hætti frekar en að nota „tungumál valdsins”, og varar við því að Sameinuðu þjóðanna geti beðið sömu örlög og Þjóðabandalagsins, sem stofnað var árið 1919 en leið undir lok eftir seinni heimsstyrjöldina.

„Þetta gæti gerst ef áhrifarík ríki ganga framhjá Sameinuðu þjóðunum og leggja út í hernað án samþykkis öryggisráðsins,” segir Pútín.

Hann segist ánægður með að samskipti hans og Obama einkennist í vaxandi mæli af gagnkvæmu trausti, en varar við tali Bandaríkjaforseta um að Bandaríkin njóti sérstöðu og séu öðru vísi en aðrar þjóðir: „Það er afskaplega hættulegt að hvetja fólk til að líta á sig sem einstakt í sinni röð, hver svo sem hvötin er.”

Þarna er hann að vísa til orða Obamas í ávarpi hans á þriðjudagskvöld, þar sem Obama sagði að „hugsjónir og lífsreglur” Bandaríkjamanna séu í húfi í Sýrlandi: „Þetta er það sem gerir Bandaríkin frábrugðin öðrum,” sagði Obama. „Þetta er það sem gerir okkur einstök.”

Pútín hittir í dag John Kerry, utanríkisráðherra Bandaríkjanna, sem hyggst spyrja Rússlandsforseta ítarlega út í það hvernig Rússar hugsa sér að fá Sýrlendinga til að afhenda efnavopn sín aðþjóðlegum eftirlitsmönnum.