Unnið að umbótum í Vatíkaninu

Frans páfi fundaði í þrjár klukkustundir á þriðjudag með yfirmönnum allra deilda Vatíkansins, að því er fram kemur í umfjöllun Washington Post í Bandaríkjunum.

Páfi er sagður hafa lýst vilja sínum til þess að koma á meiri samvinnu og gagnsæi í störfum kaþólsku kirkjunnar þar sem stjórnarhættir hafa alla jafna verið í þá veru að leynd hefur hvílt yfir ákvarðanatöku og skipanir komið að ofan.

Um það bil þrjátíu manns sóttu fundinn, þar á meðal æðstu menn átta söfnuða og tólf ráða Vatíkansins, auk yfirmanna dómskerfis og úr stjórnsýslu Vatíkansins.