Afríkusambandið segir kosningarnar í Simbabve vera trúverðugar

Fulltrúi Afríkusambandsins, sem fylgdist með framkvæmt kosninganna í Simbabve á miðvikudag, segir kosningarnar hafa verið „frjálsar, heiðarlegar og trúverðugar“. Það er í mikill mótsögn við niðurstöður óháðra samtaka sem gerðu úttekt á framkvæmdinni og sögðu að hundruðum þúsunda hafi verið vísað frá kjörstað áður en þau fengu að neyta kosningaréttar síns. BBC segir frá þessu.

Olsegung Obasani, talsmaður sendinefndar Afríkusambandsins, sagði að þau tilvik sem sagt hefur verið frá í fjölmiðlum síðustu daga hafi ekki getað breytt niðurstöðu kosninganna.

Robert Mugabe forseti og flokkur hans hafa þegar lýst yfir sigri í kosningunum þó að niðurstöður muni ekki liggja fyrir fyrr en eftir helgi.

Morgan Tsvangirai, helsti keppinautur Mugabes sagði kosningarnar hafa verið skrípaleik.