Eftirlit á Everest aukið í kjölfar fjölda dauðsfalla

Meiri gæsla verður með ferðum upp á Everest frá og með næsta ári. Samkvæmt fréttum BBC verða í fyrsta skipti staðsettir eftirlitsaðilar í grunnbúðum Everest.  Eftirlitsaðilar munu hafa umsjón með fjallgöngumönnum og hópum sem hyggjast ganga á fjallið.  Eftirlitið mun sjá um að skipuleggja björgunaraðgerðir og einnig að verndun umhverfisins.

Eftirlitið hefur verið sett í kjölfar mikillar umræðu um slæma umgengni  og fjölda slysa og dauðsfalla á fjallinu. Hingað til hefur eftirliti með fjallinu verið stjórnað frá höfuðborg Nepal, Kathmandu. Samkvæmt fréttum BBC  er orðið erfitt að fylgjast með því að reglum sé framfylgt frá höfuðborginni og því var ákveðið að færa eftirlitið í grunnbúðirnar.