Adolf Ingi meðal þeirra sem sagt er upp

Ríkisútvarpið hefur boðað til mikilla uppsagna og eru starfsmenn boðaðir einn og einn í senn uppá 5. hæð til að taka á móti uppsagnarbréfi sínu. Alls á að segja upp 60 starfsmönnum og á það við um allar deildir þó talað sé um að Rás 1 verði illa fyrir barðinu á niðurskurðarhnífnum.

Samkvæmt heimildum Vísis er þrúgandi andrúmsloft meðal starfsmanna Ríkisútvarpsins við Efstaleiti en boðaður hefur verið mikill niðurskurður sem meðal annars mun þýða að um 60 starfsmönnum verður sagt upp. Uppsagnirnar fara þannig fram að starfsmenn eru kallaðir upp á 5. hæð, þar sem Páll Magnússon útvarpsstjóri og yfirstjórnin situr, og afhent uppsagnarbréf. Meðal þeirra sem sagt er upp núna eru Adolf Ingi Erlingsson íþróttafréttamaður en hann hefur starfað hjá stofnuninni í 22 ár. Ekki þarf að efa að margir munu sakna Adolfs Inga af skjánum en mikla athygli vakti nýverið þegar hann tók viðtal við landsliðsþjálfarann Lars Lagerbäck á móðurmáli þjálfarans, sænsku.

Fréttatímum verður fækkað og þeir styttir og herma heimildir Vísis að það hafi það í för með sér meðal annars að Kristófer Svavarsson, sem flutt hefur landsmönnum fréttir að næturlagi í útvarpinu, sé meðal þeirra sem sagt er upp. Uppsagnirnar eru sagðar meiri nú en farið var í árið 2009 og þóttu þær aðgerðir sársaukafullar. Arndís Björk Ásgeirsdóttir en hún hefur annast útsendingar Sinfóníuhljómsveitarinnar er meðal þeirra sem hefur verið sagt upp. Þá eru þeir Dagur Gunnarsson, dagskrárgerðarmaður á Rás 1 og Ásgeir Eyþórsson, sem starfar á Rás 2 við þáttagerð, meðal þeirra sem eru komnir með uppsagnarbréf.

Vísir reyndi að ná tali af Páli Magnússyni í gær, vegna ástandsins, en þá var blaðamanni tjáð, af ritara hans, að Páll myndi ekki tjá sig við aðra fjölmiðla fyrr en á föstudag.