Stærsta dópverksmiðja í Evrópu á belgískum bóndabæ

Lögreglan í Belgíu hefur með aðstoð Europol stöðvað starfsemi stærstu dópverksmiðju sem fundist hefur í Evrópu. Verksmiðjan framleiddi eiturlyf á afskekktum bóndabæ nærri bænum Chimay, þar sem búfé var ræktað og grænmeti selt til grunlausra þorpsbúa.

Lögreglan lagði hald á mörg tonn af eiturlyfjum og efnum til dópframleiðslu, þar á meðal 60 milljón e-töflur að verðmæti 1,3 milljarða dala. 14 hafa verið handteknir í tengslum við rannsóknina og 11 verið ákærðir, níu karlar og tvær konur, fyrir vörslu fíkniefna, framleiðslu og dreifingu. Hinir ákærðu eru frá Belgíu, Póllandi og Tyrklandi og er glæpahópnum lýst mjög hættulegum, vopnuðum og vel skipulögðum.

Samkvæmt Francoise Fassieux, bæjarstjóra Chimey, leit bóndabærinn ósköp venjulega út að framan en fyrir aftan bæinn var verksmiðjan staðsett. 60 ára belgískur maður og pólsk sambýliskona hans bjuggu á bænum frá árinu 2004 en voru í litlum samskiptum við þorpsbúa fyrir utan sölu á búvörum sínum. Þau voru bæði handtekin.