Dæmdur í lífsstíðarfangelsi eða til dauða?

Dómur verður kveðinn upp í dag yfir fjöldamorðingjanum og geðlækninum Nidal Hasan, sem myrti þrettán og særði þrjátíu og tvo, í Fort Hood, stærstu herstöð Bandaríkjanna árið 2009.

Réttarhöldin hafa staðið yfir í á annað ár fyrir herrétti. Dómarinn hefur þegar komist að því að Hasan er sekur um morð af yfirlögðu ráði. Í dag ræðst það hvort að hann verði dæmdur til dauða eða fái lístíðarfangelsi.

Fréttaskýrendur vestanhafs segja að miklar líkur séu á að hann verði dæmdur til dauða, sérstaklega í ljósi þess að hann er ekki með lögmann og ver sig sjálfur. Og þó er varla hægt að segja það, því hann hefur lítið sem ekkert tjáð sig um ástæðu þess að hann hóf skothríðina fyrirvaralaust.

Hasan, sem er múslimi, starfaði sem læknir í bandaríska hernum. Áður en hann hóf skothríðina á félaga sína í herstöðinni öskraði hann Allah Akbar, eða Allah er mestur. Við yfirheyrslur hjá lögreglu sagðist hann vilja vernda Talíbana fyrir hermönnum í bandaríska hernum. Hann særðist í skotbardaga við lögreglu, og er nú lamaður frá brjósti og niðurúr.

Á þriðjudaginn komu ættingjar hinna látnu fyrir dóminn og ávörpuðu fjöldamorðingjann. Móðir tuttugu og níu ára hermanns, sem féll fyrir hendi Hasan, sagðist ekki geta lýst því tómarúmi sem myndast í hjarta móður sem missir barnið sitt. Hún þurfi að lifa með því á hverjum degi.

Faðir annars hermanns sagði að sársaukinn sem hann hefði upplifað síðustu mánuði og ár væri svo gífurlegur. Hann hefði drukkið ótæpilega og vinir hans hefðu tekið allar byssur af heimili hans - af ótta við að hann myndi vinna sjálfum sér mein.

Á meðan á þessum vitnaleiðslum stóð yfir sýndi Hasan engin viðbrögð - heldur starði út í loftið.

Það skýrist síðdegis hvort að Hasan verði dæmdur til dauða eða fái lífstíðarfangelsi.