Þýskaland vill hjálpa við eyðingu efnavopna

Þjóðverjar hafa boðið fram aðstoð við eyðingu efnavopna í Sýrlandi eftir að Bandaríkjamenn og Rússar náðu samkomulagi um að leggja hald á slík vopn Sýrlandsstjórnar og eyða þeim.

Í tilkynningu sem Guido Westerwelle, utanríkisráðherra Þýskalands, sendi frá sér í gær segir að þýsk stjórnvöld séu tilbúin „að veita hvort heldur sem er tæknilega eða fjárhagslega aðstoð við eyðingu efnavopna í Sýrlandi“.

Westerwelle tjáði sig ekki nánar um málið en Þýskaland hefur áður tekið þátt í slíkum verkefnum, svo sem í Líbíu og víðar.

Samkomulag sem John Kerry, utanríkisráðherra Bandaríkjanna, og Sergei Lavrov, utanríkisráðherra Rússa, náðu á laugardag kveður á um skráningu og upptöku allra efnavopna sem Sýrlandsstjórn kann að búa yfir og um refsiaðgerðir brjóti ríkisstjórn Bashars Assad gegn skilmálunum.

Eftir fundinn með Lavrov á laugardag hélt Kerry til Jerúsalem þar sem hann ræddi samkomulagið við Benjamín Netanjahú, forsætisráðherra Ísraels.

Kínverjar fögnuðu í gær samkomulagi Bandaríkjamanna og Rússa. Kínversk stjórnvöld segja fram komna friðsamlega lausn sem dragi úr spennu í Sýrlandi.