Bein útsending: Reynt að losa Costa Concordia af strandstað

Miklar og flóknar framkvæmdir standa nú yfir á strandstað ítalska skemmtiferðaskipsins Costa Concordia, sem strandaði við Ítalíuströnd í byrjun síðasta árs.

Verið er að gera þetta 114 þúsund tonna þunga skip klárt til brottflutnings, en stefnt er að því að draga það af strandstað og rífa það svo niður í brotajárn.

Töluverð spenna fylgir framkvæmdinni því margt gæti farið úrskeiðis og engan veginn víst að allt heppnist.

Skipið hefur legið á hliðinni í meira en hálft annað ár. Flotholt hafa verið fest við þá hlið skipsskrokksins, sem snúið hefur upp. Stálpallar hafa verið festir niður í hafsbotninn og togvírum komið fyrir, sem eiga að reisa skipið við þannið að það standi á pöllunum.

Heppnist það, án þess að skipið hrynji saman undan eigin þunga, þá verða flothylki fest við skipsskrokkinn hinu megin. Flothylkin eiga síðan að lyfta skipinu á flot þannig að hægt verði að draga það burt.

Umhverfið á strandstað er viðkvæmt. Þar er fjölbreytt lífríki þannig að aldrei kom til greina að sprengja og brjóta skipið niður á strandstað. Það hefði valdið alltof miklu tjóni á náttúrunni.

Skipið liggur á tveimur klettahryggjum við eyjuna Giglio og gæti hæglega runnið til þegar reynt verður að hreyfa við því, eða jafnvel brotnað saman undan eigin þunga.

Costa Concordia strandaði við strönd Toskanahéraðs Ítalíu þann 13. janúar árið 2012. Strandið kostaði 32 lífið og réttarhöldum yfir skipstjóranum, Francesco Schettino, er ólokið. Hann er sakaður um vítavert kæruleysi en neitar allri sök í málinu.

Hér fyrir neðan má sjá beina útsendingu af aðgerðunum á strandstað.