12 látnir eftir skotárás í Washington

12 manns eru látnir eftir að maður hóf skotárás í Washington-borg í dag. Lögreglustjóri borgarinnar, Cathy Lanier, hefur staðfest þetta. Maður hóf skothríð inni í stjórnstöð bandaríska sjóflotans í Washington í dag. Heimildir herma að maðurinn, sem er 34 ára gamall og frá Texas, hafi villt sér heimildir til að komast inn í stjórnstöðina.

Þetta er skæðasta skotárás í Bandaríkjunum síðan 13 einstaklingar létu lífið í skotárás í Sany Hook barnaskólanum á síðasta ári. Barack Obama, Bandaríkjaforseti, hefur fordæmt árásina.

Fjölmargir særðust einnig í árásinni en óljóst er hver fjöldi þeirra er. Lögreglan í Washington skaut árásarmanninn til bana. Hann hóf skothríð um kl. 12:30 að íslenskum tíma og var hann vopnaður hríðskotariffli, skammbyssu og haglabyssu. Heimildir fjölmiðla vestanhafs herma að maðurinn hafi verið fyrrverandi starfsmaður stöðvarinnar sem sagt var upp fyrir skömmu. Það hefur ekki verið staðfest.