Segja almenna borgara hafa fallið í loftárás Nato

Að minnsta kosti fimm almennir borgarar létu lífið í loftárás sem NATO gerði nótt nálægt bænum Jalabad í austurhluta Afganistan en frá þessu greinir á fréttaveitu AFP.



Lögregluyfirvöld á svæðinu segja börn hafa verið á meðal hinna föllnu sem voru allir á aldrinum 12-20 ára. Lögreglustjórinn Hazrat Hussain segir börnin hafa verið með loftbyssur og hafi ætlað að skjóta fugla skammt utan við bæjarmörkin.



Will Griffin, yfirmaður NATO hersveitarinnar sagði að árásin hafi verið gerð nálægt flugvelli sem hersveitir NATO nota. Hann sagði loftárásina hafa verið vel skipulagða og nákvæma og að fyrstu upplýsingar bendi til þess að engir almennir borgarar hafi fallið.



Hersveitir NATO búa sig undir að fara frá Afganistan á næsta ári en loftárásir þeirra haf lengi verið deiluefni milli heimamanna og hersveitanna. Í síðasta mánuði létu 16 manns lífið í loftárás í Kunar héraðinu í austurhluta Afganistan en á meðal hinna föllnu voru konur og börn.