Þjösnaðist á þessu í mánuð

Hólmar Örn Rúnarsson er meiddur á ökkla og missir af tímabilinu í Pepsi-deild karla af þeim sökum. Hann þarf að fara í aðgerð í dag og verður frá í minnst þrjá til fimm mánuði.

„Ég steig illa niður á æfingu og ökklinn snerist illa. Það komu í ljós brjóskskemmdir og því þarf ég að fara í aðgerð,“ sagði Hólmar, sem taldi fyrst að meiðslin væru ekki svo alvarleg.

„Þetta gerðist fyrir sex vikum síðan og ég þjösnaðist á þessu þangað til að ég fór í myndatöku fyrir einni og hálfri viku síðan,“ sagði Hólmar sem segist hafa fengið skýr skilaboð frá læknunum.

„Það þýðir ekkert að fara of snemma af stað og hann sagði mér einfaldlega að tímabilið væri búið hjá mér,“ sagði Hólmar.

Hann segist ekki enn búinn að átta sig fyllilega á tíðindunum. „Kannski kemur það eftir aðgerðina þegar ég sit upp í stúku og horfi á leiki með FH.“