Tugir fórust með farþegaferju í Filippseyjum

Að minnsta kosti 39 hafa látist og hátt í 90 er enn saknað eftir að ferþegaferja sökk undan ströndum Filippseyja í nótt eftir árekstur við flutningaskip. Sjóslys sem þessi eru algeng í Filippseyjum vegna ýmissa samverkandi þátta; veður eru oft viðsjárverð á þessum slóðum auk þess sem ástandi skipaflotans er víða ábótavant og opinbert eftirlit er afar veikt.

Alls voru 870 um borð í Thomas Aquinas sem var að sigla inn til borgarinnar Cebu á leiðinni til höfuðborgarinnar Manila, sem er um 350 sjómílur sunnar, þegar ósköpin dundu yfir. Aðstæður voru góðar, sjórinn var sléttur og ljósin frá landi sáust í fjarska þegar skipin skullu saman með þeim afleiðingum að gat rifnaði á skrokk Thomas Aquinas, sem fór á hliðina og sökk skömmu síðar.

Fylkisstjórinn í Cebu, Hilario Davide að nafni, sagði í samtali við AP-fréttaveituna að 751 hafi verið bjargað, en ekkert benti til þess að fleiri myndu finnast á lífi. Hann vildi þó ekki gefa upp alla von.

Óhappið bar að með þeim hætti að flutningaskipið var á leið frá höfninni í Cebu og klessti á afturhluta ferjunnar. Aðstæður í innsiglingunni eru með þeim hætti að skip á leiðinni inn er gert að fara öðru megin inn en skipum á úteið hinum megin. Samgönguráðherra Filippseyja, Joseph Abaya, sagði í viðtali að ljóst þætti að annað skipið hafi farið út fyrir sína siglingaleið, en rannsókn stendur yfir.

Mannskæðasta sjóslys á friðartímum varð út af ströndum Filippseyja árið 1987, þegar ferjan Dona Paz fórst eftir árekstur við olíuskip, og með henni 4.341 manns.