Helen Thomas látin

Bandaríska blaðakonan, Helen Thomas er látin, 92 ára að aldri.

Thomas var einn þekktasti stjórnmálablaðamaður Bandaríkjanna og er af mörgum talinn brautryðjandi fyrir konur í fjölmiðlum. Hún starfaði sem blaðamaður í Hvíta húsinu í fimm áratugi og þótti afar hörð í horni að taka. Tíu forsetar komu og fóru um hvíta húsið á meðan Thomas starfaði þar.

Blaðamannaferill hennar fékk þó heldur skjótan endi í júní 2010 þegar hún sagði að gyðingar ættu að hypja sig frá Palestínu heim til Póllands, Þýskalands og Bandaríkjanna. Hún sagði síðar að hún harmaði mjög þessi orð sín.