Þjóðflokkur frumbyggja kemur úr einangrun

Einangraður þjóðflokkur frumbyggja í Perú hefur gert vart við sig í annað skipti á tveimur árum, ósáttur við skógarhögg og smyglara á svæði sínu.

Mashcu-Piro þjóðflokkurinn hefur unað sáttur við sitt án tengsla við umheiminn, en virðist nú ósáttur við ólöglegt skógarhögg, sem stundað hefur verið á svæði hans. Einnig hafa smyglarar farið þar um í óþökk frumbyggjanna.

Þá hafa olíu- og gasleitarframkvæmdir á þessu svæði haft áhrif á íbúana.

Meira en hundrað frumbyggjar hafa stigið fram, vopnaðir sveðjum og bogum og haft í hótunum við íbúa í litlu þorpi við ána Las Piedras.

Náðst hefur myndband af frumbyggjunum vaða út í ána í áttina að þorpinu Monte Salvado, þar sem frumbyggjarnir eru komnir út í miðja á áður en þeir snúa við.

Á myndbandinu sjást frumbyggjar af báðum kynum og á öllum aldri vaða út í ána. Þetta gerðist þrjá daga í röð.

Þeir eru sagðir hafa krafist þess að fá banana, reipi og sveðjur, og verið bent á bananastæðu þeirra megin árinnar.

Samkvæmt lögum í Perú er bannað að hafa samskipti við um 15 þjóðflokka, sem þar búa enn einangraðir frá umheiminum í skóglendi í hlíðum Andesfjalla. Talið er að alls búi þar um 12 til 15 þúsund manns.