Neyða mat ofan í fanga

Fangelsisyfirvöld í Kaliforníufylki Bandaríkjanna hafa fengið heimild til að neyða mat ofan í fanga í hungurverkfalli, sé talið að heilsu þeirra sé stefnt í voða.

Óttast er um heilsu nærri 70 fanga í fylkinu sem allir hafa neitað að borða síðan 8. júlí, þegar fjöldamótmæli hófust vegna stefnu fangelsisyfirvalda um að setja hátt setta klíkumeðlimi og aðra ofbeldisfulla fanga í einangrun.

Þegar mótmælin hófust tóku tæplega 30 þúsund fangar í fylkinu þátt, en samtals eru um 133 þúsund fangar í fylkinu. Um 130 þeirra, sem vistaðir eru í sex mismunandi fangelsum, neita enn að láta ofan í sig mat.

Föngum hefur hingað til verið heimilt að svelta sig til dauða, hafi þeir undirritað skjal þar sem þeir afþakka lífgunartilraunir almennt. En nú hefur þessu verið breytt og mega fangelsin gefa föngum næringu í æð gegn vilja þeirra eða þræða rör ofan í maga þeirra í gegn um nefið, séu þeir taldir í lífshættu vegna næringarskorts.