John Kerry: Höfum sannanir um efnavopnanotkun Sýrlandsstjórnar

John Kerry, utanríkisráðherra Bandaríkjanna, segir Bandaríkjamenn hafa sannanir fyrir því að sarín-gas hafi verið notað í mannskæðum árásum í Damaskus í síðasta mánuði. Hann segir niðurstöður rannsókna á hár- og blóðsýnum, sem safnað var eftir árásina, staðfesta þetta.

Sérfræðingar Sameinuðu Þjóðanna hafa síðustu daga safnað gögnum sem eiga að skera úr um hvort efnavopn hafi verið notuð. Kerry gaf hins vegar í skyn við bandaríska fjölmiðla að þær sannanir sem hann hefði undir höndum væru ekki frá Sameinuðu Þjóðunum.

Kerry sagðist sannfærður um að Bandaríkjaþing muni heimila hernaðaríhlutun Bandaríkjanna í Sýrlandi. Barack Obama, forseti Bandaríkjanna, ákvað á laugardag að fresta loftárásum sem beina átti gegn sýrlensku ríkisstjórninni þangað til samþykki Bandaríkjaþings lægi fyrir.