Leyfilegt að takmarka eignarhald á fiskveiðikvóta

Hæstiréttur Noregs komst að þeirri niðurstöðu í dag að norskum stjórnvöldum hafi verið leyfilegt að takmarka eignarhald á fiskveiðikvóta við 25 ár.

Norskir útgerðarmenn höfðuðu mál á hendur stjórnvöldum eftir að lögunum var breytt árið 2007 og töldu að það væri ekki í samræmi við stjórnarskrá Noregs að breyta lögum afturvirkt. Því væri ekki hægt að afturkalla þann kvóta sem þegar væri búið að úthluta.

Útgerðarmenn unnu málið í neðri dómstigum en fjölskipaður Hæstiréttur komst hins vegar að þeirri niðurstöðu að breytingin brjóti ekki í bága við norska stjórnarskrá.