Obama leitar til McCains

Barack Obama Bandaríkjaforseti á stuðning þingmanna við hernað gegn Sýrlandsstjórn engan veginn vísan.

Hann reynir nú að fá repúblikanann John McCain til liðs við sig, þann sem atti kappi við Obama um forsetaembættið árið 2008.

Bandaríska þingið kemur ekki úr sumarfríi fyrr mánudaginn 9. september, en þingmenn eru þegar byrjaðir að hittast í nefndum til að undirbúa umræður og atkvæðagreiðslu.

Francois Hollande Frakklandsforseti hefur enn ekki látið neitt uppi um það hvort hann ætli að fá franska þingið í lið með sér, ákveði hann að grípa til aðgerða gegn Sýrlandi.

Franska þingið kemur hins vegar saman á miðvikudag til að ræða málið, og Hollande gæti varla gengið gegn vilja þingsins nú þegar David Cameron, forsætisráðherra Breta, hefur beygt sig undir andstöðu síns þings við allan hernað gegn Sýrlandsstjórn, og Obama einnig ákveðið að bera slíkar aðgerðir undir Bandaríkjaþing.

Franska stjórnin hyggst í dag leggja fyrir þingmenn sannanir þær, sem hún segist hafa undir höndum um að efnavopn hafi verið notuð í Sýrlandi, rétt eins og bæði bresk og bandarísk stjórnvöld hafa gert.

Rússar segja hins vegar lítið mark takandi á þeim yfirlýsingum um sekt Sýrlandsstjórnar, sem komið hafa frá Bretum og Bandaríkjamönnum.

Anders Fogh Rasmussen, framkvæmdastjóri NATO, hefur hins vegar í dag bæst í hóp þeirra sem segjast sannfærðir um sekt Sýrlandsstjórnar.

Enn eru samt einhverjir dagar, jafnvel meira en vika, þangað til endanlega skýrsla kemur frá efnavopnaeftirlitsmönnum Sameinuðu þjóðanna, sem sneru heim frá Sýrlandi um helgina eftir að hafa stundað rannsóknir á vettvangi í úthverfum Damaskusborgar.